இன்றைய கல்கியில் “புராதன நாற்காலி”

இந்த நாற்காலி

யாருக்காகவும் காத்திருக்கவில்லை.

அதன் இருக்கை யாரும் அமரா

வெற்றிடத்தைப் பருகியபடி இருக்கிறது.

உங்கள் பார்வைக்குத் தப்பிய கண்ணாடியில்

தன் முகத்தை நீண்ட நாட்களுக்குப்பின்

பார்த்து ரசிக்கிறது.

பின்னும் முன்னும்

பேசப்படாத வார்த்தைகளையும்

பேசப்பட்டவைகளையும் அசை போடுகிறது.

பரபரப்பின் வெம்மையைத் துறந்து

நிதானத்தின் துள்ளலைப்

பூசிக்கொண்டிருக்கும்போது

உள்ளே நுழைந்துவிடாதீர்கள்.

எந்த இசையும் ஒலிக்கப்படாத நிசப்தத்தை

அது அனுபவிக்கவிடுங்கள்.

இங்கிருந்து நாளையோ மறுதினமோ

அது அகற்றப்படும் வரை

இந்த ஏகாந்தத்தை அது அணிந்து மகிழட்டும்.

நன்றி- கல்கி- 05.08.2012