ஒரு மரணத்துக்குப் பிந்தைய காலை

அவன் இறுதியாய்

என்ன பேசினான்

என்றறியவும்-

அதற்கு முந்தைய நாள்

நடவடிக்கைகளில்

மாறுதல் ஏதும்

தெரிந்ததா என அறியவும்-

உணவருந்தியபோது

குறிப்பாய் எதையும் தவிர்த்தானா

என்றறியவும்

ஆர்வமாய் இருந்தார்கள்.

அவனின் இறுதி

மூச்சு பிரிவதைப்

பார்த்ததாகச் சொன்ன அவள்

கண்களில் ஒருவித

சாந்தம் தெரிந்ததாகவும்

சொன்னாள்.

இன்னும் சிலர்

அவன்

உறங்கிக்கொண்டிருப்பது

போல்தான் தெரிவதாகவும்

யாருக்கும் தொந்தரவு

தராமல் போய்விட்டதையும்

கவனமாகச் சொன்னார்கள்.

அவன் இறுதிநாள்

அணிந்த உடையின்

நிறம் குறித்தும்

காலணி அணியாதபடிக்குத்

தெருவில் காலையில்

சென்றது குறித்தும்

பேசியபடியே இருந்தார்கள்.

வினோதமாய்

ஒற்றைக் காக்கையின்

கரைதலும்-

எதிர் வீட்டு நாயின்

ஊளையும்-

இன்னும் சிலரின்

வார்த்தைகளில்.

எப்போதோ அவன்

இறந்து போயிருக்க

இப்போது மரணம்

வாழ்ந்துகொண்டிருந்தது.