நாளைக்கு வாழ்கிறேன்

I

படபடக்கும் நாட்காட்டியின் இடையே

உறைந்தும்-

உறைந்த கடிகாரத்தின் வட்டத்துக்குள்

துரத்தப்பட்டபடியும்

கழிகிறது காலம்.

II

நேற்றுப் போல் இன்று இல்லை

அவனுக்கு.

இன்று போல் நாளை இராது

இவனுக்கு.

நேற்றிலும் இன்றிலும்
வாழ்கிறார்கள்

அவனும் இவனும்.

நாளைக்கு

வாழ்ந்துகொண்டிருக்கிறேன்

நான்.

III

விழித்திருக்கையில்

காலத்தை நாம் கவனிக்கிறோம்.

உறங்குகையில் நம்மைக்

கவனிக்கிறது காலம்.